Յիսնակաց շրջանի մտածականները առաքելական պալատի` ''Redemptoris Mater'' մատրան մէջ։
(Ռ.Վ. 5 դեկտեմբեր 2014) Ի պատրաստութիւն Յիսուսի ս. Ծննդեան տօնին,
Վատիկանի ''Redemptoris Mater'' մատուռին մէջ, դեկտեմբեր ամսուայ ամէն ուրբաթ օր (5 -
12 եւ 19), առաւօտեան Ժամը 9ին, տեղի կ՛ունենայ Յիսնակաց շրջանի աւանդական խորհրդածութիւններու
նիստը որուն հրաւիրուած են իրենց մասնակցութիւնը բերելու` կարդինալական դասը, արքեպիսկոպոսները,
եպիսկոպոսները, Վատիկանի վերին իշխանութեան դասի անդամները ինչպէս նաեւ Քահանայապետական
միաբանութիւններու մեծաւորները։ Մտածականներու նիստերուն կը մասնակցի նաեւ Ֆրանիչկոս
Պապը։ Այսօր` Ուրբաթ 5 դեկտեմբերի առաւօտեան, առաքելական պալատի ''Redemptoris Mater''
մատրան մէջ, սկիզբ առին յիսնակաց շրջանի աւանդական մտածականներու շարքը, զոր կատարեց
Քահանայապետական տան քարոզիչը Հայր Ռանիէրօ Քանթալամեսսան եւ որուն` Ղուկասի աւետարանէն
(Ղուկ 2,14) քաղուած` այս տարուայ նիւթն է '' Երկրի վրայ խաղաղութիւն մարդոց` Աստուծոյ
սիրելիներուն''։ ''Նիւթը ընտրուած է ի տես խաղաղութեան ցաւալի իրավիճակին, զուգորդուած
այն անհրաժեշտութեան, այս բառին տալու հարուստ այն նշանակութիւնը որ պարփակուած է Աստուածաշունչին
մէջ'' յայտնած է Հայր Քանթալամեսսան։ Առաջին օրուայ խորհրդածութիւնը նուիրուած է
''խաղաղութիւնը որպէս մեր Տիրոջ Յիսուս Քրիստոսի պարգեւ'' նիւթին։ Երկրորդ նիստը, որ
նախատեսուած է յառաջիկայ ուրբաթ 12 դեկտեմբերին, ունի որպէս նիւթ` ''խաղաղութիւնը որպէս
աշխատասիրութեան պարտականութիւն'' ներշնչուած երանութիւններէն` ''երանի խաղարարներուն'',
մինչ երրորդ նիստի ընթացքին, որ նախատեսուած է 19 դեկտեմբերին, խորհրդածութիւնը պիտի
կեդրոնանայ ''խաղաղութիւնը որպէս Սուրբ Հոգւոյն պարգեւ, հոգիի ներքին խաղաղութիւնը''
նիւթին վրայ։